Sulyap Sa Hinaharap (Unang Bahagi)

Dahil sa mga nagaganap ngayon sa Iglesia, bumangon ang katanungan kung ano ang magiging kahihinatnan ng Iglesia Ni Cristo sa hinaharap? Sa tanong na ito, marami ang mga nagbigay ng kanilang kuru-kuro o pala-palagay, kapwa mababaw at malalim.

 Ang ibibigay kong sagot ay hindi batay sa kuru-kuro o pala-palagay. Nakabatay ito sa pahayag ng Biblia na siyang nagpatotoo tungkol sa paglitaw ng Iglesia Ni Cristo sa Pilipinas (Malayong Silangan) noong Hulyo 27, 1914 (mga wakas ng lupa).

 Sa pahayag sa Apocalipsis 14:12-13 ay sinasabi ang ganito:

 Kaya’t kailangang magpakatatag ang mga hinirang ng Diyos, ang mga sumusunod sa utos ng Diyos at nananatili sa pananalig kay Jesus. At narinig ko ang isang tinig mula sa langit na nagsasabi, ‘Isulat mo ito: Mula ngayon, mapapalad ang naglilingkod sa Panginoon hanggang kamatayan!’ ‘Tunay nga,’ sabi ng Espiritu. ‘Magpapahinga na sila sa kanilang pagpapagal; sapagkat susundan sila ng kanilang mga gawa’” (Apoc. 14:12-13 MB).

Ipinakikilala sa mga talatang ito ang katangian ng mga tunay na kaanib sa Iglesia Ni Cristo sa mga huling araw: sila’y matatag, sumusunod sa utos ng Diyos at nananatili sa pananalig kay Jesus.

Dahil dito, matatalikod ba ang Iglesiang ito kapag ang pag-uusapan ay ang kabuuan o ang organisasyon? Ang sagot ay HINDI at ang katunayan nito ay naroon sa mga kasunod na mga talata:

“Tumingin ako, at nakita ko ang isang puting ulap, at nakaupo rito ang isang nilikhang animo’y tao, may koronang ginto at may hawak na isang matalas na karit. Isa pang anghel ang lumabas mula sa templo at malakas na nagsalita sa nakaupo sa ulap, ‘Gamitin mo na ang iyong karit, gumapas ka na sapagkat panahon na; hinog na ang anihin sa lupa!’” (Apoc. 14:14-15 MB).

Ang katunayang ang Iglesia Ni Cristo sa kabuuan o bilang organisasyon ay hindi matatalikod ay sapagkat ito ang gawain ng Diyos na aabutan ng panahon ng paggapas o pag-aani o ng katapusan ng mundo (Mat. 13:39). Kung may pagtalikod mang magaganap ay sa hanay lamang ng mga indibiduwal na kaanib tulad ng nangyari sa mga itiniwalag at tumiwalag sa Iglesia. Sa halip na sila’y naging matatag, sumunod sa utos ng Diyos at nanatili sa pananalig kay Jesus ay maging marupok sila at matitisurin, lumabag sila sa utos ng Diyos at hindi sila nanatili sa pananalig kay Jesus.

Marami ang nagtatanong, bakit daw nangyayari ang kung ano ang nangyayari sa Iglesia ngayon? Sa muli, ang ibibigay kong sagot ay hindi batay sa kuru-kuro o pala-palagay kundi batay sa hula ng Diyos na ipinagpauna sa ikatlong bahagi ng lupain (Iglesia) na ang katuparan ay ang Iglesia Ni Cristo na lumitaw sa Pilipinas noong 1914.

“…ang ikatlo ay maiiwan. At aking dadalhin ang ikatlong bahagi sa apoy, at sila’y dadalisayin ko na parang pilak na dalisay, at sila’y susubukin ko na parang pagsubok sa ginto. Sila’y magsisitawag sa aking pangalan, at akin silang didinggin: aking sasabihin, Siya’y bayan ko; at kanilang sasabihin, Ang Panginoon ay aking Dios” (Zac. 13:8b-9).

Ang Iglesia Ni Cristo sa mga huling araw ay hinulaang maiiwan. Hindi ito matatalikod. Dadalhin ito sa apoy sa layuning subukin at dalisayin. Pinatutunayan ni Apostol Pedro na ang apoy ay sagisag ng pagsubok:

“Upang ang pagsubok sa inyong pananampalataya na lalong mahalaga kay sa ginto na nasisira bagama’t ito’y sinusubok sa pamamagitan ng apoy, ay masumpungan sa ikapupuri at ikaluluwalhati at ikararangal sa pagpapakahayag ni Jesucristo” (1 Ped. 1:7).

Hindi nga ba’t kapag ang ginto ay pinaraan sa matinding init ng apoy ay makikitang hihiwalay ang hindi tunay o impurities ng ginto at ang maiiwan ay ang lantay na ginto (pure gold)? Ano rin ang nakita nating nangyari at nangyayari sa Iglesia nang ito’y dalhin ng Diyos at paraanin sa matitinding apoy ng pagsubok? Nakita nating nahiwalay ang mga hindi tunay at naiwan o nanatili ang mga tunay na kaanib at tunay na sumasampalataya.

Kaya, ano ang magiging kahihinatnan ng Iglesia Ni Cristo sa hinaharap? Ang Iglesia Ni Cristo ay mananatiling matatag at kailanman ay hindi matatalikod. Ang maiiwan o matitirang kaanib ay ang mga tunay, matiyaga, sumusunod at nananatili sa pananalig kay Jesus—mga karapat-dapat sa tunay na kapahingahan sa Bayang Banal (Apoc. 21:1-4).

Alalahanin sana ng lahat ng kaanib sa Iglesia Ni Cristo ang hinihintay ng Diyos kapag pinaraan na tayo sa apoy ng pagsubok:

"...Sila’y magsisitawag sa aking pangalan, at akin silang didinggin: aking sasabihin, Siya’y bayan ko; at kanilang sasabihin, Ang Panginoon ay aking Dios.”

May kasunod.

 

Lowell Menorca: Ang Sagot

“We didn’t try to BURY you, because we know that you are WEEDS.”