Sulyap Sa Hinaharap (Ikaanim na Bahagi)

Sa bilis ng takbo ng panahon, masasabi nating ilang panahon na lang ay magsasagawa nang muli ng Sta. Cena ang buong Iglesia Ni Cristo. Alam nating bago pa man ito dumating ay maagap ang Pamamahala sa Iglesia Ni Cristo upang igayak ang buong Iglesia upang maging karapat-dapat sa pagtanggap ng Banal Na Hapunan.

Ang mahalagang tanong ay paano naman ang mga natiwalag sa Iglesia noong nakaraang taon dahil sa paglaban sa Pamamahala?

Sabagay may bukod na silang pagsamba, may bukod na rin silang ministro at manggagawa na nangangasiwa ng pagsamba, at kung tama ang aking pagsusuri ay may bukod na rin silang pamamahala na siyang nagsusugo sa kanilang mga ministro at manggagawa sa kanilang tinatawag na “EGM” o Ecclesiastical Group Meeting.

Magkakaroon na rin kaya sila ng bukod na Sta. Cena sa kauna-unahang pagkakataon?

Kung hindi, paano pa mapatatawad ang kanilang kasalanan na parami nang parami habang parami nang parami ang kasinungalingan na kanilang ikinakalat sa social media?

Kung mayroon naman silang isasagawang Sta. Cena, narito ang ilang mga katanungang dapat nilang sagutin:

 

•                 Sino ang mangangasiwa nito?

•                 Ano ang karapatan niya at saan ito galing?

•                 Ano ang karapatan ng nagbigay sa kaniya ng karapatang mangasiwa ng Sta. Cena?

•                 Kung dati siyang may karapatang mangasiwa ng Sta. Cena noong nasa loob pa siya ng Iglesia at ng ministeryo, paano niya nasabing nasa kaniya pa rin ang karapatang ito gayong hindi na siya nakaugnay sa Pamamahala at dahil dito’y hindi na rin siya nakaugnay kay Cristo at sa Diyos mula nang siya ay matiwalag sa Iglesia?

•                 Patatanggapin ba nila ng Sta. Cena si Rovic “Sher Lock” Canono na itiniwalag sa panahon pa ni Ka Erdy dahil sa kaso ng imoralidad?

•                 Patatanggapin ba nila ng Sta. Cena si Grace “Benito Affleck” Hernandez, si Lito Fruto at ang iba pa nilang mga kasama na mga itiniwalag dahil sa iba’t ibang kaso?

•                 Saan manggagaling ang tinapay na ipatatanggap nila sa kanilang mga kasama?

Baka itanong nila, “ano naman kung may bukod kaming Sta. Cena”?

Ano ba ang kahulugan ng Sta. Cena kaya hindi ito magiging katanggap-tanggap na gawin ng mga natiwalag sa Iglesia Ni Cristo?

“Ang saro ng pagpapala, na aming pinagpala, hindi ba ito ay ang pakikipag-isa sa dugo ni Cristo? Hindi ba ang tinapay na pinagputul-putol, hindi ba ito ay ang pakikipag-isa sa katawan ni Cristo?” (1 Cor. 10:16 Bible’s Int’l.)

Ang kahulugan ng Sta. Cena ay pakikipag-isa (pakikibahagi sa saling NPV) sa katawan at sa dugo ng ating Panginoong Jesucristo. Kaya kapag kumakain tayo ng tinapay na pinagputul-putol ay nakikipag-isa tayo sa katawan ni Cristo na pinakuan sa krus at kapag umiinom naman tayo mula sa saro ng katas ng ubas ay nakikipag-isa tayo sa Kaniyang dugo na nabuhos sa Bundok na Kalbaryo.

Sino ang inuutusan na magsagawa ng Sta. Cena o Banal na Hapunan at makibahagi rito?

“Bagaman tayo’y marami, ay iisa lamang tinapay, iisang katawan: sapagka’t tayong lahat ay nakikibahagi sa isa lamang tinapay” (1 Cor. 10:17).

Ang iisang katawan na tinutukoy rito ay ang Iglesia na ang ulo ay si Cristo (Col. 1:18). Bagaman marami tayo bilang mga sangkap, bawa’t isa sa atin ay bahagi o sangkap ng katawan o Iglesia na siyang Iglesia Ni Cristo. Ang inuutusan na makibahagi sa Sta. Cena ay ang mga kaanib sa Iglesia Ni Cristo. Kaya nga kasama sa mga tanong na dapat masagot ng mga natiwalag sakaling mag-isip sila na magsagawa rin ng Sta. Cena ay “Saan manggagaling ang tinapay na ipatatanggap nila sa kanilang mga kasama?” sapagkat ayon kay Apostol Pablo, “tayong lahat ay nakikibahagi sa isa lamang tinapay.” Kung may bukod na tinapay ang mga natiwalag ay lilitaw na hindi na isang tinapay iyan kundi dalawa na.

Ano ang banal na katuwiran kaya tanging ang mga kaanib sa tunay na Iglesia Ni Cristo lamang ang may karapatan na magsagawa ng Sta. Cena at makibahagi rito?

“Ako ngayon ay nagagalak sa aking mga paghihirap alang-alang sa inyo. Pinupunuan ko sa aking katawan ang mga kakulangan ng mga paghihirap ni Cristo para sa kapakanan ng kaniyang katawan, ang iglesiya” (Col. 1:24 Bible’s Int’l.).

“Mga lalaki, ibigin ninyo ang inyu-inyong asawa, gaya ng pag-ibig ni Cristo sa iglesya. Inihandog niya ang kanyang buhay para rito” (Efe. 5:25 MB).

Ang paghihirap ni Cristo at ang Kaniyang kamatayan sa krus ay para sa kapakanan ng Kaniyang Iglesia na Kaniyang katawan na ito ay ang Iglesia Ni Cristo (Gawa 20:28 Lamsa). Samakatuwid, kahit pala mag-isip ang mga natiwalag na magsagawa rin ng bukod na Sta. Cena, ang lahat ng ito ay mawawalan lamang ng kabuluhan at hindi magbubunga ng kapatawaran ng kasalanan.

Ano ang sama kapag ang kasalanan ay hindi napatatawad?

“Kundi ang bawa’t tao ay natutukso, pagka nahihila ng sariling masamang pita at nahihikayat. Kung magkagayo’y ang kahalayan, kung maipaglihi ay nanganganak ng kasalanan: at ang kasalanan, pagka malaki na ay namumunga ng kamatayan” (Sant. 1:14-15).

Kapag hindi napatawad ang kasalanan, ito ay lalaki at kapag ito’y malaki na, mamumunga ito ng kamatayan na ang tinutukoy ay hindi lamang yaong pagkalagot ng hininga kundi ang ikalawang kamatayan o kaparusahan sa dagat-dagatang apoy (Apoc. 20:14).

Kaya sa ganang tunay na mga Iglesia Ni Cristo, napakahalaga ng pagtanggap ng Sta. Cena sapagkat ito ang banal na okasyong itinatag ni Cristo upang mapatawad ang lahat ng kasalanan na nagawa ng kaanib mula nang siya ay mabautismuhan o mula nang huli siyang tumanggap ng Sta. Cena.

“At samantalang sila’y nagsisikain, ay dumampot si Jesus ng tinapay, at pinagpala, at pinagputolputol; at ibinigay sa mga alagad, at sinabi, Kunin ninyo, kanin ninyo; ito ang aking katawan. At dumampot siya ng isang saro, at nagpasalamat, at ibinigay sa kanila, na nagsasabi, Magsiinom kayong lahat diyan; Sapagka’t ito ang aking dugo ng tipan, na nabubuhos dahil sa marami, sa ikapagpapatawad ng mga kasalanan” (Mat. 26:26-28).

Paano kung ipilit pa rin ng mga natiwalag na magsagawa ng Sta. Cena gayong wala namang silang karapatang gawin ito?

“Ang sinumang kumakain ng tinapay at umiinom sa saro ng Panginoon nang di nararapat ay nagkakasala sa katawan at dugo ng Panginoon” (1 Cor. 11:27 MB).

Maliwanag na ayon sa pagtuturo ni Apostol Pablo, kapag ang pagtanggap ng Sta. Cena ay hindi nararapat, ang gayon ay nagkakasala lamang sa katawan at dugo ng Panginoon. Sana napansin ninyo ito. Hindi lamang hindi napatatawad sa kasalanan kundi nadaragdagan pa ng kasalanan ang mga oo nga’t magsasagawa ng Sta. Cena subalit hindi naman nararapat. Ang totoo, iyan ay sinabi sa mga magsasagawa ng Sta. Cena sa loob ng Iglesia Ni Cristo. Gaano pa kaya kung ang magsasagawa ng Sta. Cena ay mga tiwalag at nasa labas na ng Iglesia Ni Cristo?

Paano makikilala ang tumatanggap ng Sta. Cena nang hindi nararapat?

“Sapagkat ang sinumang kumakain at umiinom nang hindi pinahahalagahan ang katawan ng Panginoon, ay kumakain at umiinom ng hatol sa kanyang sarili” (1 Cor. 11:29 MB).

Ang tumatanggap ng Sta. Cena nang hindi nararapat ay ang hindi nagpapahalaga sa katawan ng Panginoon. Literal na katawan ang pinuhunan ng Panginoong Jesucristo upang matubos ang espirituwal na katawan Niya na Siyang Iglesia.

 

Ang mga natiwalag na lumaban pa sa Pamamahala ng Iglesia Ni Cristo ay hindi nagpapahalaga kapuwa sa literal at espirituwal na katawan ni Cristo. Sila ngayon ang dahilan kung bakit nilalait at hinahamak ng sanlibutan ang Iglesia Ni Cristo sa mga huling araw na ito. 

Samantala, mayroon bang makapaghihiwalay na anuman o sinuman sa mga naninindigan sa pakikipagkaisa kay Cristo?        

“Sino ang makapaghihiwalay sa atin sa pagmamahal ni Cristo? Ang paghihirap ba, ang kapighatian, ang pag-uusig, ang gutom, ang kahubaran, ang panganib, o ang tabak? Hindi! Ang lahat ng ito’y kayang-kaya nating pagtagumpayan sa pamamagitan niya na nagmamahal sa atin. Sapagkat natitiyak kong ang kamatayan, ang buhay, ang mga anghel, ang mga pamunuan, ang mga bagay sa kasalukuyan, ang mga bagay na darating, ang mga kapangyarihan, ang kataasan, ang kalaliman, o ang alinmang nilalang ay hindi makapaghihiwalay sa atin sa pag-ibig ng Diyos—pag ibig na ipinadama niya sa atin sa pamamagitan ni Cristo Jesus na ating Panginoon” (Rom. 8:35, 37-39 MB).

Walang anuman at walang sinuman ang maaaring makapaghiwalay sa isang kaanib na naninindigan sa kaniyang pakikipag-isa kay Cristo o sa kaniyang pagka-Iglesia Ni Cristo.

Kaya natitiyak natin na kapag nagpilit na magsagawa ng Sta. Cena ang mga natiwalag na ito na lumaban sa Pamamahala, madaragdagan lamang ang kanilang kasalanan at dinagdagan pa nila ang dahilan para sila’y hatulan.

Kaya, ano ang itinuro ni Apostol Pablo na dapat gawin ng mga kaanib sa Iglesia Ni Cristo na tatanggap ng Sta. Cena para maging karapat-dapat ang kanilang magiging pagtanggap nito?

“Kaya, dapat siyasatin ng tao ang kanyang sarili bago kumain ng tinapay at uminom sa saro” (1 Cor. 11:28 MB).

Ano ang dapat namang siyasatin bago tumanggap ng Sta. Cena?

“Siyasatin ninyo ang inyong sarili, kung kayo’y nangasa pananampalataya; subukin ninyo ang inyong sarili. Hindi baga ninyo nalalaman sa ganang inyong sarili, na si Jesucristo ay nasa inyo? maliban na nga kung kayo’y itinakuwil na” (2 Cor. 13:5).

Nananagot ang tatanggap ng Sta. Cena na siyasatin ang sarili at suriin kung siya’y nasa pananampalataya pa at kung si Jesucristo ay nasa kaniya pa o baka siya ay itinakuwil na. Hindi makapapasa rito ang mga natiwalag kaya huwag na silang mangarap na magsagawa pa ng bukod na Sta. Cena sapagkat pinalalala lamang nila ang kanilang kalagayan.

Tanging ang Diyos lamang ang nakaaalam kung bakit sila’y tuluyang nagdilim na nagawa pa nilang kalabanin at lapastanganin ang Pamamahala ng Iglesia Ni Cristo. Ngunit isang hayag na katotohanan na ang tumanggap ng Sta. Cena nang hindi nararapat ay hinahatulan ng Diyos kaya sa pangyayari sila ang pinapagdidilim ng Diyos pagkatapos nilang tumanggap ng Sta. Cena. Ito mismo ang nangyari kay Judas Iscariote.

“Sumagot nga si Jesus, Yaong aking ipagsawsaw at bigyan ng tinapay ay siya nga. Kaya’t nang maisawsaw niya ang tinapay, ay kinuha niya at ibinigay niya kay Judas, na anak ni Simon Iscariote. At pagkatapos na maisubo, si Satanas nga ay pumasok sa kaniya. Sinabi nga sa kaniya ni Jesus, Ang ginagawa mo, ay gawin mong madali” (Juan 13:26-27).

Itatanong marahil ng mga natiwalag na ang iba’y bunga lamang ng kabiglaanan o ng padalus-dalos na pagpapasiya o nadala lamang ng simpatiya, “ano ang nararapat naming gawin lalo na ngayong malapit na ang pagsasagawa ng buong Iglesia Ni Cristo ng Sta. Cena”?

“Ang mga gawain ng taong masama’y Dapat nang talikdan, at ang mga liko’y Dapat magbago na ng maling isipan; Sila’y manumbalik, Lumapit kay Yahweh upang kahabagan, At mula sa Diyos, Matatamo nila ang kapatawaran” (Isa. 55:7 MB).

Napakagandang pagkakataon ng nalalapit na Sta. Cena lalo na para sa mga natiwalag na magbalik-loob at manumbalik sa Diyos. Ngunit dapat na silang magbago ng maling isipan. Dapat na nilang talikdan ang kasamaan at kalikuan.

May kasunod.

 

Lowell Menorca: Ang Sagot

“We didn’t try to BURY you, because we know that you are WEEDS.”