Sulyap Sa Hinaharap (Ikatlong Bahagi)

Huwag na muna nating pag-usapan ang 12 taon mula ngayon kundi ngayon pa lamang na ang mga anak ng mga natiwalag ay mga musmos o bata pa. Simulan natin doon sa sanggol na naipanganak nang panahong tiwalag na ang mga magulang.

Ang tanong ko sa inyo na mga natiwalag ay ito:

May balak ba kayong ihandog ang inyong sanggol na anak? Saan? Alam ninyong hindi maaari sa loob ng Iglesia Ni Cristo. Samakatuwid kung kinikilala ninyong mahalaga ang paghahandog sa mga maliliit na bata upang magkaroon ng bahagi sa kaharian ng langit (Mat. 19:13-15), mapipilitan kayong ihandog ang inyong anak sa inyong bukod na pagsamba.

“Nang magkagayon ay dinala sa kaniya ang maliliit na bata, upang ipatong niya ang kaniyang mga kamay sa kanila, at ipanalangin: at sinaway sila ng mga alagad. Datapuwa't sinabi ni Jesus, Pabayaan ninyo ang maliliit na bata, at huwag ninyong pagbawalan silang magsilapit sa akin: sapagka't sa mga ganito ang kaharian ng langit. At ipinatong niya ang kaniyang mga kamay sa kanila, at umalis doon” (Mat. 19:13-15).

Sino ang maghahandog sa inyong mga anak? Ano ang karapatan niya at saan galing? Saan galing ang karapatan ng nagbigay sa kaniya ng karapatang ito?

Paano kaya sasabihin ng ministro ninyo at hihilingin sa Diyos na matala nawa ang pangalan ng batang ito sa aklat ng buhay sa langit gayong hindi naman siya matatala sa talaan ng Iglesia Ni Cristo? At ang mismong humihiling nito na ministro ay wala sa talaan ng Iglesia. O baka babaguhin na naman ninyo ang interpetasyon dito na maaaring matala sa langit kahit hindi nakatala sa talaan ng Iglesia Ni Cristo. Sabagay ang dami na ninyong bagong pinaniniwalaang aral na ang marami sa mga ito ay sa impluwensiya ng isang nagtatago sa pseudonym na Sebastian Rauffenburg na nagpapanggap lamang na INC o dating INC para makapandaya. Amoy na amoy na galing sa ibang iglesia o samahan, hindi pa maamoy ng iba.

Narito pa: paano sasabihin ng ministro at hihilingin sa Diyos na masakop siya (ang sanggol) ng Pamamahala ng Iglesia? Aling Pamamahala? Ang Pamamahalang nilabanan ninyo, minura, nilait, nilapastangan at sinabihang mapupunta sa impiyerno? O ang bukod na pamamahala ninyo?

Maaari ba na iisa ang Iglesia Ni Cristo, tapos dalawang magkabukod na Pamamahala? Kaya kung magpapatuloy talaga kayo sa inyong gawain, darating at darating ang panahon, mapipilitan kayong bumukod at magtatayo kayo ng sarili ninyong Iglesia, na may bukod na pamamahala at aral na gusto ninyo. Ayaw lang ninyong aminin sapagkat tiyak na ang naakit ninyo ay biglang kakalas sa inyo at magbabalik-loob sa Iglesia Ni Cristo.

May kasunod.

Lowell Menorca: Ang Sagot

“We didn’t try to BURY you, because we know that you are WEEDS.”