Ang Kamandag ng Simpatiya

Prologo

May isang drayber na binabagtas ang kahabaan ng EDSA. Maingat niyang sinusunod ang batas trapiko pati ang itinakda nitong speed limit. May isang pedestrian na biglang tumawid. Hindi sinunod ang babala na huwag tumawid sa mismong kalsada kundi gamitin ang itinalagang over pass.

Sinikap ng drayber na magpreno subalit hindi umabot. Nabangga niya ang pedestrian. Tumalsik ito at nagkalasug-lasog ang katawan. Nakita ng mga istambay ang pangyayari. Kaibigan nila ang nabundol. Dali-daling pinuwersa nilang papalabas ang drayber at binugbog hanggang sa hindi na makilala ang mukha nito.

Sumigaw ang drayber, “Wala akong kasalanan. Siya ang biglang tumawid kaya siya nabundol.” Lalong nanggigil ang mga tao sa pambubugbog sa kaniya at hindi siya tinatantanan hanggang hindi nagkakalasug-lasog ang kaniyang katawan.

Pagsusuri

Tanong: Sino ang mali o may kasalanan?

Sagot: Hindi nga ba’t ang pedestrian na nabundol?             

Tanong: Bakit ang drayber ang binugbog gayung sinunod naman niya ang batas trapiko?

Sagot: Iyan ang kamandag ng simpatiya.

Mali ba na magkaroon ng simpatiya?

Hindi natin sinasabing mali o masama ang simpatiya. Ang simpatiya ay isang mahalagang damdamin na nagpapakilala sa pagiging makatao ng isang tao. Sa pamamagitan nito, naihahayag niya ang pakikiramay niya sa nararamdaman ng kaniyang kapuwa na nagdaraan sa isang trahedya o sa isang masaklap at mapait na karanasan. Sa pamamagitan ng simpatiya ay nasasabing niya sa kaniyang kapuwa na “nauunawaan ko ang pinagdaraanan mo.”

Sa kabilang dako, ang kawalan ng simpatiya ay nagpapahiwatig ng pagiging manhid ng isang tao o ng pagkakaroon ng pusong bato.

Sa Biblia, isang kaatasan sa mga Cristiano ang magdamayan sa isa’t isa (1 Ped. 3:8 NPV). Isinalin ito sa Ingles nang ganito:

Finally, all of you, live in harmony with one another; be sympathetic, love as brothers, be compassionate and humble (1 Pedro 3:8 NIV, emphasis ours)

Mahalaga, kung gayon, na magkaroon tayo ng simpatiya. Gayunpala, bakit namin sinasabi na ang simpatiya ay may kamandag? Sapagkat nagagamit ito ng iba para sa kanilang makasariling layunin. Ang simpatiya ay namamaniobra ng iba para makakuha sila ng maraming tagasunod na tutulong sa kanila para maipagtagumpay ang kanilang maitim na binabalak.

Maaalaala pa siguro nating mga Filipino na may napatalsik sa pagiging Presidente ng bansa dahil sa kamandag ng simpatiya. At ito ring kamandag ng simpatiya ang ginamit upang mailuklok sa pagiging President ng bansa ang isang tao na walang sapat na karanasan sa larangang ito.

Ang kamandag na ito ng simpatiya ang siya ring ginagamit ng mga naghimagsik sa Pamamahala ng Iglesia Ni Cristo kailanma’t makakasipat sila ng pagkakataon. Ito ay upang makaakit ng mga tagasunod at magmungkahi ng galit laban sa Tagapamahalang Pangkalahatan ng Iglesia Ni Cristo at sa kanilang pamilya at mga pangunahing kinakatulong sa Pamamahala.

Ano nga ba ang naramdaman ng iba nang marinig ang tinig ni Ka Tenny na nananawagan at nagsasabing may nagtatangkang masama laban sa kaniyang mga anak na si Lottie, Angel at Marc? At nang basahin sa buong mundo ang tungkol sa pagkakatiwalag nila, ano rin ang naramdaman ng iba? Hindi ba simpatiya?

Nang marinig ng marami ang detalye ng diumano’y masaklap na pinagdaan ni Lowell “BOY-et” Menorca II at ng kaniyang asawa (na ginamitan pa ng nangangatal na tinig na tonong umiiyak bagaman walang luhang kasama), ano ang naramdaman ng iba? Hindi ba simpatiya rin?

At nang may mamatay sa No. 36 Compound na kasambahay ni Angel, ano ang ginawa nila? Dali-dali nilang ipinukol ang sisi sa Pamamahala ng Iglesia Ni Cristo. Sa anong layunin? Para makakuha ng simpatiya at sa panig naman nila ay makapaghugas ng kanilang kamay.

Ang hindi alam ng mga naghimagsik na ito laban sa Pamamahala ng Iglesia Ni Cristo, ang kamandag ng simpatiya ay hindi nagtatagal. Unti-unti rin itong naaalis sa sistema ng tao lalo na kung nabubuksan na ang isip at kamalayan ng mga tao sa totoong pangyayari. Sa sandaling sila’y mahimasmasan, mapapalitan ang kanilang simpatiya ng inis at galit laban sa mga taong “nanggamit” sa kanila.

Hindi nga ba ito ang sinasabi ng iba nang marinig ang pagkakatiwalag nina Angel at Marc? Totoong napaluha sila sapagkat ang bahagi ng pamilya ni Ka Erdy ay natiwalag. Subalit nang mahayag ang sabwatan ng magkapatid para ibagsak ang kanilang kuya o ang Ka Eduardo bilang Tagapamahalang Pangkalahatan; nang makita nilang tahasang nilalapastangan ng marami ang Tagapamahalang Pangkalahatan dahil sa kagagawang ito ng magkapatid na Angel at Marc, ano ang sinabi nila pagkatapos? Sayang daw ang luha na iniukol nila para sa magkapatid na Angel at Marc sapagkat unti-unting lumalabas at nahahayag ang maitim na kulay at balak ng mga lumalaban sa Pamamahala na nagtatago sa pangalang “INC Defenders” daw (gayong sila’y mga tiwalag).

Nabuksan na ang pananaw ng marami na hindi “restoration” ang gusto ng mga ito kundi “demolition” at “demoniolition.”

Kaya marapat lamang na maging maingat ang lahat lalo na kapag may bumangon na isang hindi kanais-nais na pangyayari. Tandaan na maaari itong gamitin ng iba para makakuha ng simpatiya at magmungkahi ng galit o poot laban sa Iglesia Ni Cristo. Sa halip na magpadalus-dalos ay sikapin munang alamin ang totoo at buong pangyayari.

Bilang pagsunod sa aral na itinuro ni Apostol Juan, ang mga kaanib sa Iglesia Ni Cristo ay hindi dapat makisimpatiya sa mga dating ministro, maytungkulin, at kaanib na lumaban sa Iglesia at natiwalag:

“Kung ang sinuman ay lumapit sa inyo at hindi dala ang doktrinang ito [manapa’y taksil sa itinuro ni Jesucristo]. Huwag [ninyo] siyang tanggapin [huwag siyang kilalanin, huwag sasalubungin ni papasukin] sa [inyong] tahanan ni sabihan siyang nawa’y magkaroon ka ng mabuting kapalaran ni magbigay sa kaniya ng anumang pagpapalakas. Sapagkat ang sinomang naghahangad na siya’y magtagumpay [na pinapalakas pa ang loob, at hinahangad na siya’y pagpalain ng Diyos] ay kasangkot din sa kaniyang masamang mga gawain” (salin mula sa 2 Juan 1:10-11 Amplified Bible).

Sa panahong ito ng ligalig na pinagdaraan ng Iglesia, sundin natin ang ipinayo ni Apostol Pedro na maging SOLIDO ANG ATING PANANAMPALATAYA.

“Be sober and on watch. Your adversary, the Devil, walks about like a roaring lion, seeking someone to swallow. Resist him, be solid in your faith, knowing that the same sufferings are being performed by your brethren who are in the world” (1 Peter 5:8-9, Messianic Renewed Covenant).

Lowell Menorca: Ang Sagot

“We didn’t try to BURY you, because we know that you are WEEDS.”