Nasaan ang mga tiwalag? Nasa loob o nasa labas ng Iglesia Ni Cristo?

Sa ganang mga tunay na Ministro at kaanib ng Iglesia Ni Cristo, ang sagot ay nasa labas ng Iglesia Ni Cristo ang mga tiwalag. Kaya ang katumbas ng sinabi ni Apostol Pablo na “Itiwalag ninyo ang masamang kasamahan ninyo” sa 1 Corinto 5:13 MB ay “… put that sinful person out of your church” (NLV, emphasis mine).

Kapag sinabing “PUT … OUT OF YOUR CHURCH,” kung gayon, nasaan na ang mga dating nasa loob ngunit ngayon ay tiwalag na? Nasa loob pa rin ba o nasa labas? Nasa labas. Sa iba pang salin ng Biblia ay sinasabing, “alisin nga ninyo sa inyo ang masamang tao” (Dating Salin, emphasis mine).  

Kung tatanungin naman ang mga dating Ministro at kaanib ng Iglesia subalit ngayon ay nagdilim na, kung nasaan ang mga tiwalag, ano ang isasagot nila? Ang mga tiwalag daw ay ang mga nasa loob ng Iglesia at nasa talaan pa nito subalit nabubuhay naman sa masamang gawain. Paano naman daw sila na dating kaanib subalit ngayon ay nasa labas na ng Iglesia at wala na rin ang pangalan sa talaan sa Iglesia? Hindi raw totoo na sila ay mga tiwalag.

Sabagay, hindi kataka-taka na may mga ganiyang tao na ang tawag ng Biblia ay mga baliktad ang isip:

Kawawa kayo, mga baligtad ang isip! Ang mabuting gawa ay minamasama, Ang masama naman ay minamabuti, ang kaliwanaga’y inaaring dilim at ang kadilima’y liwanag ang turing. Mapait na apdo ang sabi’y matamis at ang matamis ay minamapait (Isa. 5:20 MB).

Hindi nga ba’t baliktad ang isip ang sabihing ang tiwalag ay ang nasa loob pa at nananatili pa sa talaan ng Iglesia at ang mga dating nasa loob na ngayo’y nasa labas na at wala na sa talaan ng Iglesia ay hindi tiwalag.

Tao lang daw ang nagtiwalag

Ano ang tunay na dahilan kaya sinasabi ng mga natiwalag na dating Ministro at kaanib ng Iglesia na hindi raw sila tiwalag? Una, ito ay upang makakuha ng simpatiya sa mga kasalukuyang kaanib sapagkat paano nga naman sila kakampihan ng mga kaanib kung sila’y mga tiwalag na sa Iglesia.

Ikalawa, para bigyang-katuwiran ang kanilang isinisigaw na sila ay mga INC Defenders daw. Paano nga naman nila masasabing sila’y INC Defenders kung hindi naman sila INC (Iglesia Ni Cristo).

Paano naman nila pinalilitaw na hindi sila tiwalag gayong binasa pa sa mga pagsambang kongregasyunal ng Iglesia Ni Cristo ang kanilang pangalan at ang pasiya na sila’y itiwalag? Sinasabi nilang tao lang naman daw ang nagtiwalag sa kanila at hindi ang Diyos.

Sadyang pinagdilim na ng Diyos ang kanilang pag-iisip. Alam nila at ito ay itinuturo pa noon ng mga dating Ministro na ito ng Iglesia na ang kalagan sa lupa ay kinakalagan sa langit. Ang pagkakalag na tinutukoy ay ang pagtitiwalag (Mateo 18:18; 1 Cor. 5:13 MB).

Ang karapatan sa pagkakalag ay ibinigay ni Cristo sa Pamamahala sa Iglesia. Ang Pamamahala rin ang binigyan ng karapatan sa pagtatali o pangangaral ng mga salita ng Diyos. Ang mga natalian ng mga kautusan ng Diyos sa paraang sila’y pinangaralan, sumampalataya at nabautismuhan sa loob ng Iglesia Ni Cristo  (Mar. 16:15-16; 1 Cor. 12:13 NPV) ay itinala sa talaan ng Iglesia. Kaya naman ang mga pangalan nila ay nakatala sa aklat ng buhay sa langit na siyang aklat na kinasusulatan ng pangalan ng mga maliligtas (Heb. 12:22-24 TLB; Gawa 20:28 Lamsa; Apoc. 20:12, 15; Dan. 12:1).

Tanong, hindi ba ito alam ng mga dating Ministro na ngayon ay tiwalag na sa Iglesia? Hindi nila maikakaila na ito ay alam nila sapagkat ito ay itinuro nila noon sa mga umaanib pa lamang sa Iglesia Ni Cristo at hindi miminsang itinuro nila sa panahon ng mga pagsamba. Ang suliranin nga lamang ay baka alam nga nila subalit hindi sinampalatayanan kaya hindi kataka-takang sila ay nahiwalay sa Iglesia Ni Cristo gaya ng mga alagad ni Jesus na nahiwalay dahil sa kawalan ng pananampalataya (Juan 6:60-61, 64, 66).

Isa pa, bakit nang sila ay itinala sa talaan ng Iglesia ay hindi nila ito kinuwestiyon at sinabing “bakit tao ang nagtatala sa atin, hindi ba marapat na ang Diyos mismo ang magtala sa atin?” Subalit hanggang ngayon ay hindi naman nila ito kinukuwestiyon. Alam nila kung gaano kalahaga na sila’y itinala ng tao sa talaan ng Iglesia kaya nga iginigiit nila na hindi sila tiwalag. Alam nila na ang itinala ng tao sa talaan ng Iglesia ay itinatala naman ng Diyos sa talaan ng mga pangalan na nasa aklat ng buhay sa langit.

Kung gayon, bakit nila ngayon kinukuwestiyon na tao lang ang nagtiwalag sa kanila at hindi ang Diyos. Gusto na ba nilang ibahin at baguhin ang nakasulat sa Mateo 18:18? Ganito ba ang nais nilang palitawin: “ang lahat ng mga bagay na inyong talian sa lupa ay tatalian sa langit: at ang lahat ng mga bagay na inyong kalagan sa lupa ay kayo-kayong lang ang nagkalag at hindi kakalagan sa langit.

Isa pang dahilan kaya nila itinatanggi na sila’y tiwalag ay sapagkat kung ito’y tatanggapin nila ay para na rin nilang tinanggap na wala na ang pangalan nila sa aklat ng buhay sa langit.

Bukod dito, sino ba ang inutusan ng Diyos na itiwalag ang masamang kasamahan? Alinsunod sa kalooban ng Diyos na itinuro ni Apostol Pablo, “Itiwalag ninyo ang masamang kasamahan ninyo” (1 Cor. 5:13 MB). Malinaw na ang tao (Pamamahala) ang inuutusan na itiwalag ang mga hindi na karapat-dapat na manatiling kaanib sa Iglesia Ni Cristo.

Bakit may pagtitiwalag pa?   

Ang pagtitiwalag ay iniutos ng Diyos na dapat gawin sa mga masamang kasamahan. Ang tanong ay bakit ito ipinag-utos ng Diyos?

Ang nais ng Diyos ay abutan ang Iglesia Ni Cristo na nasa kalagayang sakdal na tulad sa dalagang malinis (Col. 1:28-29; 2 Cor. 11:2). Ang pagtitiwalag ay isa sa mga kaparaanan ng paglilinis sa paraang ang bawa’t sanga (kaanib) na hindi nagbubunga (bunga ng kabanalan), ay inaalis ng Diyos (Juan 15:2, Fil. 1:11). Ang pagtuturo ng mga salita ng Diyos upang ang mga kapatid ay sumunod sa katotohanan at mahikayat na isagawa ang puspusang pagbabagong-buhay ay isa pa ring kaparaanan ng paglilinis. Gayunman, hindi kasama sa mga kaparaanan ng paglilinis ang ginawa ng mga nagpapakilalang INC Defenders na idinemanda ang Pamamahala ng Iglesia at naghasik pa ng katakut-takot na mga kasinungalingan sa internet.

Ano na ang kalagayan ng mga dating sanga (kaanib) subalit inalis na sa Iglesia o itiniwalag? May karapatan pa ba silang sumamba sa Diyos? Wala na sapagkat sinumang hiwalay kay Cristo o hiwalay sa Iglesia Ni Cristo ay walang Diyos at walang pag-asa sa kaligtasan (Efe. 2:12 Salita ng Buhay). Paano kung ngayong sila’y tiwalag na ay ipagpatuloy nila ang pagsamba sa Diyos na gaya nga ng ginagawa nila ngayon? Tapos na ang pasiya ni Cristo nang sabihin Niyang “kung kayo’y hiwalay sa akin ay wala kayong magagawa” (Juan 15:5). Ang hindi nila magagawa ay kung ano magbubunga ng kabanalan at kaligtasan para sa kanila. Sa halip, ang mga hiwalay (dati nang hiwalay, kusang humiwalay o inihiwalay) ay nakatakdang itapon sa apoy upang masunog (Juan 15:4, 6).

Isang panawagan sa mga natiwalag sa Iglesia Ni Cristo

Kung may mahalagang magawa ang lahat ng mga natiwalag sa Iglesia, mula pa noon at hanggang ngayon ay ang magbalik-loob sa Diyos. Lamang ay dapat pailalim sa kondisyon ng Diyos ang sinumang magbabalik-loob sa Kaniya (Isa. 1:16 MB; Isa. 55:7 MB).

Alam naming alam ninyo na ang kaligtasan ay matatagpuan lamang sa Iglesia Ni Cristo. Alam naming alam ninyo na ang inabot ng kamatayan o ng araw ng paghuhukom na nasa kalagayang tiwalag ay hindi maliligtas.

Ang nagiging hadlang nga lamang sa iba ay ang kanilang “pride.” Hindi nila magawang isuko ang “pride” at aminin na nagkamali sila gayung ang isa pa naman sa mga kondisyon ng Diyos para patawarin ang nagbabalik-loob ay ang magpakumbaba (2 Kron. 7:14 MB).

Sana’y alalahanin ninyo ang mga salitang ito na mula sa mga apostol: “Yamang kami'y mga katulong sa gawain ng Diyos, ipinamamanhik namin sa inyo na huwag ninyong sayangin ang pagkakataong ibinibigay sa atin ng Diyos” (2 Cor. 6:1 MB, emphasis mine).

Lowell Menorca: Ang Sagot

“We didn’t try to BURY you, because we know that you are WEEDS.”