Ibigin ninyo ang inyong mga kaaway! (Part 4)

“Datapuwa’t sinasabi ko sa inyo, Ibigin ninyo ang inyong mga kaaway, at idalangin ninyo ang sa inyo'y nagsisiusig.” (Mat. 5:44)

karugtong ng Part 1, Part 2 at Part 3

Ang utos na ibigin ang mga kaaway ay hindi maaaring magpawalang-bisa sa utos na ibigin ang pagkakapatiran. Ang totoo, kung nararapat mang gumawa ng mabuti sa ating kapuwa, binigyang-diin ni Apostol Pablo na dapat gumawa ng mabuti lalo na sa mga kapatid sa pananampalataya.

“Samantalahin natin ang lahat ng pagkakataon sa paggawa ng mabuti sa ating kapwa, lalo na sa mga kapatid sa pananampalataya” (Gal. 6:10 MB).

Kung makita ba nating sinasaktan ng ating kaaway ang ating kapatid sa pananampalataya ay wala na ba tayong gagawin dahil lamang sa may utos na ibigin ang kaaway? Mas kakampihan ba natin ang nananakit sa kapatid natin dahil may utos na ibigin ang kaaway? Paano naman ang utos na ibigin ang kapatid? Mas matimbang ba ang utos na ibigin ang kaaway kaysa sa utos na ibigin ang kapatid?

Ang mga tiwalag na lumaban sa Pamamahala ay sinasaktan ang ating mga kapatid at hindi lamang mga karaniwang kapatid. Sinasaktan nila ang ating Namamahala, ang kaniyang pangunahing kinakatulong sa Pamamahala at maging ang mga Ministro at Manggagawa na nanindigan sa panig nila. Kakampihan ba natin ang mga tiwalag na ito dahil lang sa may utos na ibigin ang kaaway?

Kaya walang masama sa ginagawa ng mga tagapagtanggol ng Iglesia at Pamamahala na pagpuna at pagtuligsa sa mga ito. Mas matimbang para sa amin ang pag-ibig sa mga kapatid kaysa sa mga kaaway.

Ang sabi ng iba ay nauunawaan nila na dapat talagang ipagtanggol ang Pamamahala at ang Iglesia, ngunit magagawa naman daw ito nang mahinahon at maayos. Ano ba ang sinasabi ng Biblia na dapat gawing pagsaway sa mga katulad ng mga tiwalag na ito na nagkakalat ng kasinungalingan at paninira sa Iglesia?

¹⁰“Sapagka’t may maraming mga suwail, na mapagsalita ng walang kabuluhan at mga magdaraya, lalong lalo na yaong mga sa pagtutuli, ¹¹Na ang kanilang mga bibig ay nararapat matikom; mga taong nagsisipanggulo sa buong mga sangbahayan, na nangagtuturo ng mga bagay na di nararapat, dahil sa mahalay na kapakinabangan. ¹³Ang patotoong ito ay tunay. Dahil dito’y sawayin mong may kabagsikan sila, upang mangapakagaling sa pananampalataya (Tito 2:9-11, 13).

Ang utos ay sawaying may kabagsikan ang mga suwail, mapagsalita ng walang kabuluhan, mga magdaraya, mapagsalita ng walang kabuluhan, mga magdaraya at nagsisipanggulo sa buong sambahayan ng Diyos o Iglesia. Ang itinumbas sa pahayag na sawayin mong may kabagsikan sila sa iba’t ibang salin ng Biblia sa Ingles ay “reprove them harshly” (ACV), “Speak sharp words to them” (NLV) at “confront them ruthlessly” (SENT).

Hindi naman ito nangangahulugan na wari bagang may lisensiya na tayo na murahin ang mga taong ito na yumuyurak sa dangal ng Iglesia at ng Pamamahala nito. Walang gayong doktrina ang Iglesia. Nananatiling mali na murahin ng sinuman ang kahit na sino. Subalit hindi dahil sa may ilan na maaaring natuksong magmura ay natatakpan ng kapintasan o kasalanang ito ang kalapastanganang ginagawa ng mga tiwalag na ito na lumaban sa Iglesia.

Ang kalapastanganan nilang ito ay pagbabayaran nila sa araw ng paghuhukom sapagkat tulad ng binanggit na sa unahan, sila ay “walang pagsalang lilipulin sa kanila ring pagkalipol.”

Sa araw ding iyon matutupad ang sinabi ni Apostol Pablo na:

¹⁹“Huwag kayong mangaghigantihan, mga iniibig, kundi bigyan ninyong daan ang galit ng Dios: sapagka’t nasusulat, Akin ang paghihiganti; ako ang gaganti, sabi ng Panginoon” (Rom 12:19).

Lowell Menorca: Ang Sagot

“We didn’t try to BURY you, because we know that you are WEEDS.”